Fundargerð stjórnar Félags eldri borgara Selfossi (11/2023)
fundur stjórnar FebSel, haldinn föstudaginn 17.11.2023- 10:30 í Uppsölum, Grænumörk 5.
Mætt: Magnús J. Magnússon (MJM) formaður, Ólafía Ingólfsdóttir (ÓI) varaformaður, Guðrún Guðnadóttir (GG) gjaldkeri Guðrún Þóranna Jónsdóttir (GÞ) ritari, Ólafur Bachmann (ÓB) meðstjórnandi, Ólafur Sigurðsson (ÓS) og Valdimar Bragason (VB) varamenn.
- Formaður setti fund 10:30.
- Fundargerð síðasta fundar lögð fram og samþykkt samhljóða.
- Heimsóknir úr stjórnkerfinu. MJM bauð Braga Bjarnason formann bæjarráðs Árborgar velkominn á fundinn, Sigþrúður Birta Jónsdóttir deildarstjóri velferðarþjónustu hafði einnig verið boðið á fundinn en komst því miður ekki vegna óviðráðanlegra orsaka.
Það urðu miklar umræður um öldungaráð og starfssemi þess.
Helstu niðurstöður voru:
- það er mikilvægt að vinna nýtt erindisbréf/samþykkt fyrir ráðið þar sem það hefur ekki verið uppfært síðan 2015.
- að öldungaráð hitti bæjarstjórn einu sinni á ári.
- að formaður FebSel fái fundarboð öldungaráðs.
Einnig kom fram tillaga um að hafa tvisvar á ári fund með stjórn FebSel og fulltrúum frá bæjarstjórn. Töluvert hefur fjölgað í félaginu á síðustu árum, nú er fjöldi fólks í Árborg eldra en 67 ára 1.666. Mikilvægt er að ná til þeirra sem búa einir og glíma kannski við einsemd. Heilsueflingin sem er í Selfosshöllinni er greinilega komin til að vera, stöðugt fjölgar í hópunum sem koma í leikfimina tvisvar í viku. Lífsgæði aukast í heilsueflingunni, og voru fundarmenn sammála um að þetta væri góð forvörn fyrir elli kerlingu. Rætt hvort möguleiki væri að greiða niður fyrir þá sem ekki treysta sér í heilsueflinguna í Selfosshöllinni en eru í annarri heilsueflingu. Á dagskrá eru bæði stólajóga og stólaleikfimi, einnig hefur stjórn borist beiðni um sundleikfimi frá eldri borgurum. Athugað verður hvort einhverjir lausir tímar eru í kennslulauginni. Það er spurning um útfærslu, hvort félagið eða Árborg sér um að greiða kennara laun. Endurnýjun á samningi milli Árborgar og FebSel var í vinnslu fyrir ca. einu og hálfu ári. Ákveðið var að ljúka þeim samningi. Spurt var hvort hægt væri að fá tvo skjái í salina með tengingu? Bragi vísar því máli til Margrétar Elísu. Einnig bar á góma abler-skráningarkerfið sem lögð hefur verið töluverð vinna í að skoða. Margt er í gangi hjá félaginu og umsvif orðin mikil.
Því næst þakkaði MJM Braga kærlega fyrir komuna og góðar umræður. Því miður sá Margrét Elísa sér ekki fært að mæta á fundinn.
- Afgreiðsla mála frá síðasta fundi. Búið er að ganga frá og undirbúa aðventuhátíðina.
- Hvað er framundan? Í skoðun hefur verið hvort eldri borgarar væru tilbúnir að taka á móti nokkrum börnum frá Leikskólanum Álfheimum einu sinni í viku og sinna þeim á einhvern máta. Hugmynd hefur komið upp um hvort eldra fólk á Árblik sé tilbúið að taka á móti þeim. GG og GÞ munu kanna það.
- Önnur mál.
- Uppgjör frá árshátíðinni: Miðinn var seldur á 8000 kr. 187 manns keyptu sig inn og 5 fengu frímiða. Hótel Selfoss fékk fyrir matinn og húsið: 1.341.900 kr., Prentmet fyrir auglýsingu: 44.640 kr., Jón Bjarnason veislustjóri: 80.000 kr. og Gísli Einarsson uppistandari: 60.000 kr. Tap á árshátíðinni var 30.540 kr.
- Hugmynd var rædd um að félagið greiddi niður kaffið í Opnu húsi. Eftir nokkrar umræður varð niðurstaða varð að stjórn telur affarasælla að bjóða einstöku sinnum í kaffi eða/og greiða fyrir rútuferðir.
- Beiðni hefur borist frá Rauða krossinum um að fara og heimsækja mann á Fossheimum sem bundinn er í hjólastól.
- Fram kom að allar tengingar hafa verið lagðar að leirbrennslu- og postulínsofninum og er hann tilbúin fyrir notkun.
Fundi slitið.
Næsti fundur verður 01.12 kl. 10.30 og boðaður með dagskrá.
__________________________ __________________________
Guðrún Þóranna Jónsdóttir Magnús J. Magnússon
ritari formaður